Freitag, 24. Mai 2013

Mol was anneres

Also neilich hodd än Lautremer (Kaiserslauterer, sic!) Ornithologe feschdgschtellt, daß aa unser Vöggel ihrn eigene Dialekt zwitschern, unn daß die pälzische viel schäner singen wie zum Beischpiel die ausm Schwarzwald odder in dä Alpe. Ich habs jo schun immer gewißt.
Wie schä des Pälzische widderum aus Menschemund klingt, zwitschert Ihne am neggschde Dienschdag de Billy Hutter. In (vorder-)pälzischer Geheimsprooch erscheint jetzt soi Buch ›Doppelkopp odder de Verräter vun Speyer‹, was die Buchkultur-Initiativ gern unnerstitzt hodd. Nadierlich is des kä normales Dialektbuch, wie mer sich denke kann, bei denne Beteiligte. Es is die Gschicht vun dem Speyerer Rumtreiwer Schorsch Dasch. Der hodd des verrickte ›Unternehmen Pastorius‹ vun de Nazis mitgemacht, wo ä handvoll agelernte Hilfsagente Amerika mit zwee U-Boote hedden agreife solle. De Schorsch wollt des eigentlich gar ned unn hodd des ganze dem FBI verroode. Zum Dank hodd er ä paar Johr ameriganisches Milidärstroflager kriggt unn is dann abgschowe worre. Des geheime Milidärtribunal, wo denn Schorsch unn die annere abgeurteilt hodd, is schun domols fer nedd verfassungsmäsisch ghalte worre. In Guantanamo hänn se des dann trotzdem widder genauso gemacht. De arme Schorsch is dann dehääm in Adenauer-Deitschland bloß de Verräter vun Speyer gewest, unn es ism gar nedd gut gange. In soine alte Daag hodd er in Ludwigshafe bei soine Schwester gewohnt unn owends im ›Contra‹ mit ä paar junge Kerl als Doppelkopp gspielt. Dodebei hodd er ab unn zu unn nur brockeweis vun soim Lewe verzählt. De Billy Hutter, äner vun dere ›Contra-Bande‹ hodd se jetzt uffgschriwwe, genauso durchenanner unn verschwurbelt wies de Schorsch domols gemacht hodd. Zu dem schäne Büchel gebts aa noch ä Hörbuch, unn des ganze werd als Performance präsendiert im Ludwigshafener Stadtmuseum. Herzlichi Oiladung.
(Marita Hoffmann)
 
Buchvorstellung und Performance
›Doppelkopp odder de Verräter vun Speyer‹
von und mit Billy Hutter
Dienstag, 28. Mai 2013, 19 Uhr
Stadtmuseum Ludwigshafen im Rathaus-Center

è Initiative Buchkultur: Das Buch e.V.

Keine Kommentare: